Heimar og Himingeimar er samkoma leidd af nördum sem eru orðin stór, einu-sinni-krökkum sem pössuðu ekki alveg inn í hópinn og brenna fyrir að börn og ungmenni finni sinn hóp og að þau sem eldri eru og hafa alltaf bara nördast í skápnum viti að þau eru ekki ein, eru velkomin og að enginn er „of gamall“ til að leika sér. Stefna Heima og Himingeima er að stuðla að upphafningu búningaáhugamálsins á jákvæðan, opinn og styðjandi máta og að leggja áherslu á félagslegan þátt spuna- og búningaleikja, sporna gegn félagslegri einangrun, skapa öruggt rými fyrir ungmenni sem ekki finna sig í almennum íþróttum þvert á kyn- og kyngervi, hampa leikgleði og efla sjálfstraust ungmenna, kenna handverk og hvetja til virkar þátttöku almennings í andlega gefandi skemmtun og samfélagi.

Samkoman er hugsuð fyrir einstaklinga í jaðaráhugamálum tengdum búninga- og leikmunagerð, ásamt endursköpun og spunaleikjum, til að kynnast, hittast og tengjast og rjúfa félagslega einangrun þvert á aldur og áhugamál, og brjóta á bak aftur staðalímyndir og kreddur. Með því að sýna allt sem er í boði og hvetja til þátttöku í efnisheimi á skapandi hátt og með ríka áherslu á samskipti og samveru þvert á aldur ásamt jákvæðum fyrirmyndum má efla sjálfstraust og styrkja fólk andlega til ytri samskipta.

Heimar og Himingeimar leggur áherslu á íþróttir sem krefjast sögulegs fatnaðar (s.s. sögulegar evrópskar skylmingar / HEMA) og búninga (leik- og sviðsbardagar, dans og skylmingar). Við skiljum mikilvægi þess að stunda heilbrigða hreyfingu og viljum upphefja slíkt innan hópa sem oft hafa ekki haft áhuga á hefðbundnum keppnisíþróttum.

Mikilvægi samneytis og að verja tíma með börnum og unglingum hefur mikið verið í deiglunni undanfarið og hér gefst frábært tækifæri fyrir foreldra að tengjast börnum sínum og ungmennum betur og jafnvel uppgötva sjálf áhugamál sem þau geta deilt með börnum sínum og stuðlar hátíðin þannig að heilbrigðum tengingum þvert á aldurshópa. Með því að opna þeim og foreldrum þeirra aðgang að reyndari einstaklingum innan hópsins getum við ekki aðeins ýtt undir skapandi vinnu heldur einnig kynnt þennan heim fyrir fólki sem þekkti hann ekki og boðið foreldrum ungmenna stuðning, en innan hópsins eru m.a. félags- og tómstundafræðingar, sálfræðingar og mannfræðingar.

Mikilvægt er að aðgangur og þátttaka öll sé ókeypis. Fólk býr við afar mismunandi kjör og því var lagt upp með frá upphafi að hafa viðburðinn eins aðgengilegan og mögulegt væri; efnahags- og félagslega og óháð líkamlegu atgerfi. Þátttaka í smiðjum, verkefnum, keppnum og samtalshópum er með öllu án endurgjalds og er samkoman að nær öllu leyti unnin af sjálfboðaliðum sem láta sig málefnið varða.

Ef foreldra og forráðamenn vantar frekari upplýsingar bjóðum við þeim að hafa samband við verkefnasstjóra Heima og Himingeima á [email protected] eða í síma 585 5690.

Hvað er hvar? Hér er það!

Hvað eru Heimar og Himingeimar? Heimar eru samkoma búningaáhugafólks þvert á áhugamál og spannar allt frá menntuðum klæðskerum til myndasögunörda og bardagafólks.

Hver stendur fyrir þessu? Heimar og Himingeimar eru haldnir af fjölda félaga í búningaáhugamálum með stuðningi og styrk Bókasafns Hafnarfjarðar og Hafnarfjarðarbæjar. Heimar og Himingeimar eru styrkþegar Barnamenningarsjóðs.

Mega öll koma? Já. Öll velkomin, alltaf. Við erum öruggt rými, og hér er ekkert aldurstakmark - í hvoruga áttina.

Hvað kostar að koma? Ekkert. Ekki krónu með gati. Mættu bara.

Hvað er búningur? Búningur, sama hvort við ræðum um þjóðbúning eða stormsveitarbrynju, er samansafn af klæðum og aukahlutum sem verða að sérstæðu útliti og/eða klæðnaði þegar við setjum þau saman.

Þarf ég að vera i búningi? Nei – ekki frekar en þú vilt. Það skiptir okkur öllu máli að þér líði vel. Vertu á gallabuxum eða í heimsins stærsta búningi, okkur finnst þú æði eins og þú ert.

Má ég mæta með sverð/vopn? Boffervopn (Larpvopn) eru leyfileg. Einungis þeir sem tilheyra Rimmugýg og HEMA Reykjavík mega hafa á sér stálvopn (life steel) og verður eggin að vera með öllu bitlaus. Skotvopn verða að vera augljóslega leikmunir og merkt með appelsínugulu hlaupi. Nerf-skotfæri eru ekki leyfð á svæðinu. Aukalega má taka fram að loftbyssur (BB guns) eru ólöglegar hérlendis.

Hvar skrái ég mig í Cosplay-keppnina? Smelltu hér!

Hvar er klósettið? Á 1. hæð við stigann upp á barnadeildina.
Í kjallara beint niður stigann hjá barnadeild.
Á 2. hæð bak við upplýsingaþjónustuna.

Ég er svangur/svöng/svangt! Við erum ekki með mat til sölu, en hinumegin við planið er Kaffi Barbara með ýmislegt gott. Hinumegin við hringtorgið er svo Norðurbakkinn og Brikk (Bakaríið, ekki orkurinn). Verslunarmiðstöðin Fjörður er svo mínútulabb í burtu og þar má finna ýmislegt!

Má ég taka myndir? Að klæðast búningi er ekki samþykki fyrir myndatökum. Það má taka myndir, en munið að fá samþykki viðkomandi fyrst. Virðið persónulegt rými, og munið að sumir búningar skerða hreyfigetu og skynfæri. Komið fram við aðra eins og þið viljið láta koma fram við ykkur.
Og taggið okkur á Instagram.

Mér líður illa, hvað á ég að gera? Hvað sem kemur upp, hvað sem gerist - við erum hér. Sérmerkt Safe-Space starfsfólk er alltaf tilbúið að taka á móti þér. Hvort sem þú upplifir þig undir pressu vegna fjöldans, þú verður fyrir áreiti, meiðist, eða líður illa þá erum við hér.
Það er alltaf einn öruggur starfsmaður við Stjörnuspillinn (1. hæð) og einn á Smiðjuhæðinni (2. hæð). Þau eru merkt með hárauðri barmnælu. Einnig eru slíkir starfsmenn á vappi. Gríptu einn – og við hjálpum þér.
Það eru líka róleg hvíldarhorn bæði á barnadeildinni og 2. hæð, ef þú þarft bara smá púst.

Ég meiddi mig! Í afgreiðslunni á 1. hæð er hægt að fá plástra og fleira.

Búningaves? Á 2. hæð er fullt af snillingum sem geta hjálpað. Svo er líka Cosplay Rest Area á sömu hæð og þar má finna tól til að bjarga sér í skyndi.

Mig langar í svona Himingeimabol! Ekkert mál - þú getur keypt svoleiðis hér

Hvern eiga fjölmiðlar að hafa samband við? Fjölmiðlar geta haft samband við Unni Möller, verkefnastjóra Heima og Himingeima í tölvupósti ( unnurmoller [hjá] hafnarfjordur.is ) eða í síma 621-4679.

Öll dagskrá er birt með fyrirvara um breytingar